24 03 30 FISGAS DE ERMELO

 

PUNTO DE SAÍDA TRAZADO DA RUTA GALERÍA DE FOTOS PDF CASTELÁN MAPA PARA IMPRIMIR

 

 

SITUACIÓN: Parque Natural do Alvâo (Vila Real) Portugal

PUNTO DE PARTIDA: Ermelo (430 m)

ACCESO: Desde Vila Real (31 km) pola IP- 4 e N - 30

HORARIO: 4/5 horas            DESNIVEL: 670 m                       DISTANCIA: 13 km

DIFICULTADE: Media       TIPO DE RUTA: Circular

COTA MÍNIMA: Ponte da Ribeira da Fervença (325 m)                

COTA MÁXIMA: Alto da Cabeça Grande (670 m)

MAPA: C.I.G. – 87 – 101

SINOPSE: Ruta polo val do río Ôlo, no corazón da Serra do Alvâo, entre Ermelo e Varzigueto no que destacan as paisaxes rurais e a fervenza das Fisgas de Ermelo, resultado dunha falla xeolóxica que creou un tramo de río accidentado, sinuoso e profundo con sucesivas fervenzas e pozos.

 

DESCRICIÓN DA RUTA: Xunto á igrexa parroquial de Ermelo parte esta camiñada en dirección norte pola rúa principal, pasando unha zona de terras en bancais e atravesando un bosque de carballos e castiñeiros. Así chegamos á ponte da Ribeira da Fervença (325 m), punto máis baixo deste percorrido.

            Cruzamos pola ponte de madeira e comezamos a subida nun tramo que temos unha corda para axudar na progresión. Un pouco máis arriba chegamos a un camiño máis ancho,  con moita pedra solta, que sobe abruptamente monte arriba cara á aldea de Varzigueto polo cimbro que divide os dous vales, o da Ribeira da Fervença e o do río Ôlo.

            Na cota dos 500 m temos o miradoiro de Lomba do Bulhâo, desde o cal pasamos a camiñar pola ladeira do río Ôlo. Seguimos subindo ata acadar o Alto da Cabeça Grande (670m) sendo neste tramo onde temos magníficas vistas das Fisgas do Ermelo.

            O camiño vai achegándonos ao río para entrar en Varzigueto, aldea que cruzamos en toda a súa lonxitude para saír á estrada asfaltada. Aquí collemos á esquerda camiñando uns metros por ela ata atravesar o río por unha ponte, na que collemos un camiño á esquerda.

            Esta pista pasa pola Cancela do Miradoiro onde temos un cartel informativo baixando logo ao aparcadoiro do miradoiro das Fisgas de Ermelo. Seguimos val abaixo, ben por carreiros ou camiños forestais. Podemos ver Ermelo máis abaixo pero, antes de chegar a el, o río fai uns meandros de grande fermosura. Nunha curva máis pechada, o río desvíase dunhas rochas para formar unha pequena fervenza que desemboca nunha lagoa moi fermosa, Pioças de Abaixo.

            Logo de pasar un pequeno bosque de sobreiras, séguese por unha pista entre paredes de laxe, moi preto do río, que volvemos a cruzar, esta vez pola ponte de Abelheira, máis ancho é tamén de madeira.

            Pola outra beira comezamos a subida cara a Ermelo, onde se atopan os bancais de cultivo chegando así ao remate da andaina.