12 09 16 Valle de la Llosa de Viango (Llanes) Asturias

 

VER PUNTO DE SAÍDA

 

VER TRAZADO DA RUTA VER GALERÍA DE FOTOS PDF EN CASTELÁN

SITUACIÓN: Llanes (Asturias)

PUNTO DE PARTIDA: Alto de la Tornería (471 m)          PUNTO DE CHEGADA: Purón (40 m) 

ACCESO: Dende Llanes, collemos a estrada LL – 7, que pasa por Pancar e Parres ata o cruce de Santa Marina, onde nos desviamos pola que vai ao Mazuco pasando polo Alto de la Tornería.                               

HORARIO: 5/6 horas                    DESNIVEL: 110 m de subida/538 m de baixada             

DISTANCIA: 14 km            DIFICULTADE: Baixa    TIPO DE RUTA: Travesía              MAPA: I.G.N. – 32 - III 

SINOPSE: O val de Viango está situado entre a serra do Cuera e o cordal de Texeu, ao sur de Llanes. Tanto na entrada Este como Oeste, o val é bastante estreito ensanchándose a medida que se aproxima á Llosa de Viango. Neste lugar existe un pequeno lago adicándose parte do terreo a pastoreo para os veciños de La Pereda, Parres e Porrua. Na zona que hai ente Los Corros e Viango as parcelas son individuais. O Llano de Viango e a Llosa de Viango son terreos comunais existindo parcelas individuais nas ladeiras.

DESCRICIÓN DA RUTA: No alto de La Tornería (470 m), collemos á esquerda un camiño ancho con lixeira subida, que nos achega á cabana e praderías de Los Corros. Dende aquí seguimos o camiño que sae á dereita ata a cabana de Collau los Corros (550 m).

            Neste lugar, temos que abandonar o camiño e coller un sendeiro pola esquerda que baixa lixeiramente por unha zona rochosa entre o val que forma a serra do Cuera, á dereita, e o promontorio rochoso de El Cantu, á esquerda.

            Axiña comezamos a cruzar as cabanas e praderías de Bardales, seguindo o noso camiño pola ladeira de El Cantu, chegando así, á antiga braña de La Embía (700 m), fermoso lugar, no que aínda podemos ver os restos das antigas cabanas, arrodeadas de grandes faias, espiños, freixos, castiñeiros, abelairas e algún que outro acivro.

            Seguimos baixando ata a fonte con bebedeiro de El Tronco (660 m). Agora camiñamos pola ladeira da dereita, entre cabanas, chegando así a Llosa de Viango (418 m). Esta é unha ampla zona de prados, practicamente chá, onde se atopa unha pequena lagoa e varias pozas. Cara ao sur podemos ver o murallón de El Traviesu, xunto co faial. Ao norte temos os penedos do Cueto de Acá, a Garma, a Valleya, Saldepiedra, Pica Collar e Pica Calvieyu.

           Segundo vamos avanzando pola Llosa, o val vaise estreitecendo en forma de embude ata chegar a Los Cuervos del Valle de la Raíz, lugar onde se refuxia o gando en días de calor. O camiño sobe agora lixeiramente polo val de La Raíz, seguindo rumbo leste, ata o cimbro de La Raíz (523 m), onde damos vista ao val seguinte de La Mardola.

            O sendeiro segue baixando pola ladeira esquerda, preto do río Torno (330 m). Temos que cruzar o regato da Riega de la Pasada e seguir baixando a media ladeira polas Cuestas. Axiña atravesamos a zona de prados e cabanas de La Ligareda, xa case no fondo do val.

            Despois de pasar estas cabanas, quedando a nosa dereita a Fuente Grande, seguindo o sendeiro chegamos a unhas fincas cerradas, con cabanas e a Fuente Chica. Continuamos polo sendeiro cara as cabanas de Peliscas (401 m), que podemos distinguir por unha antena, baixando agora lixeiramente ata o río Torno, que cruzamos para seguidamente subir á zona de pastos e cabanas de Pruneda (346 m)

            A partir deste lugar, temos unha pista ancha que, costa abaixo, nos leva a Purón (45 m).