19 04 20 Montes Obarenes
|
MAPA PARA IMPRIMIR |
SITUACIÓN: Valle de Tobalina e Frías (Burgos)
PUNTO DE PARTIDA: Orbañanos (604 m)
ACCESO: Orbañanos está a 14 km de Herrán pola estrada BU - 530
HORARIO: 5/6 horas DESNIVEL:1.000 m de subidas / igual de baixadas
DISTANCIA: 18 km DIFICULTADE: Media TIPO DE RUTA: Travesía
COTA MÍNIMA: Preto de Frías (522 m) COTA MÁXIMA: Pico Humión (1.437 m)
MAPAS: I.G.N. – 136 – II – IV
SINOPSE: Ruta interesante que comeza en Orbañanos para subir por un fermoso sendeiro entre bosque de faias e buxos que remata en Frías, a cidade máis pequena de España e un dos mellores exemplos de arquitectura medieval militar española.
O pico Humión (1.437 m) é a cima máis alta dos Montes Obarenes, ofrecendo en días despexados unhas panorámicas moi amplas.
DESCRICIÓN DA RUTA: Saímos de Orbañanos (604 m) cara á base do monte. Logo de pasar o cemiterio, o camiño intérnase no monte chegando axiña a un cruce de camiños, collendo o desvío da esquerda, e sempre seguindo as sinais do PR.
Comezamos a subida polo carreiro dentro do bosque aumentando a inclinación sen ningún chan para coller folgos. O bosque está cuberto de buxos, aciñeiras e algúns érbedos. Gañamos altura rapidamente camiñando bastante tempo baixo cuberta vexetal.
Na cota de 780 m, podemos ver, á nosa dereita a Peña Aguda. O sendeiro sae e entra repetidas veces no bosque, agora cruzamos un pequeno bosquete de faias deixando definitivamente o bosque a partir dos 1.100 m de altitude para saír a terreo despexado.
Seguimos subindo ata a cota dos 1.200 m, onde xiramos á esquerda para subir ao pico Flor (1.338 m). Agora estamos no cimbro da serra, polo que xiramos en dirección oeste seguindo a crista da serra. O tramo final é un estreito esporón rochoso, sen perigo algún, que nos deposita no cume do Humión(1.437 m).
Saímos deste cume en dirección oeste, pasando por Talos Somos (1.409 m) e a partir de aquí seguiremos en dirección noroeste o resto do camiño. Vamos pola crista que seguimos sen ningún problema, sempre perdendo altura, para entrar na cidade de Frías pola Senda del Gitano que remata na bifurcación de estradas que van a Valderrama e Montejo.
Pasamos por a paraxe de Soto e logo xunto ao convento de Vadillo e a fonte e muíño de Caparrota, entrando en Frías polo Barrio de Abajo.