19 06 16 Valle del Curueño (Nocedo de Curueño) León

 

PUNTO DE SAÍDA

TRAZADO DA RUTA

GALERÍA DE FOTOS

PDF CASTELÁN

MAPA PARA IMPRIMIR

 

Nocedo – Valdeteja - Valverde

 

SITUACIÓN: Valdepiélago e Valdelugueros (León)

PUNTO DE PARTIDA: Nocedo de Curueño (1.050 m)

ACCESO:Desde a estrada CL – 626, en La Vecilla coller a LE – 321 que vai polo val do río Curueño

HORARIO: 3/4 horas                      DESNIVEL: 350 m              DISTANCIA: 10 km

DIFICULTADE: Baixa                    TIPO DE RUTA: Travesía

COTA MÍNIMA: Nocedo de Curueño (1.050 m)

COTA MÁXIMA: Collada de Valdenocillo  (1.396 m)            MAPA: I.G.N. – 104 – I – III   

SINOPSE: O Valle del Curueño, río que nace no Puerto de Vegarada, é un espazo cicelado pola auga encaixada entre dúas grandes serras rochosas. Está  situado no curso do río do mesmo nome na Montaña Central Leonesa, limitando ao norte con Asturias ata a súa unión no encoro de Porma.

            Os vales altos pertencen ao Paleozoico mentres que das foces  para abaixo, ábrense terreos do Terciario.

 

DESCRICIÓN DA RUTA: Logo de visitar a fervenza do rego Valdecesar camiñamos pola estrada LE – 321 en dirección norte algo menos dun quilómetro. Chegamos a un cruce onde á esquerda sobe unha pista que vai a Valdorria e á dereita temos, atravesando o río Curueño por unha ponte, o lugar de Nocedo.

            Cambiamos de marxe do río, agora levámolo á nosa esquerda, para subir pola pista que vai ao antigo balneario. Aquí hai unha ponte pero, o noso camiño segue de fronte, ata a seguinte ponte. Neste lugar, cruzamos o río para seguir de novo pola estrada uns cen metros, ata que aparece un camiño á esquerda, un pouco antes das Hoces de Valdeteja.

            Agora vamos en lixeiro ascenso, pasando xunto a dúas fontes, tendo na primeira parte da ruta uns tres quilómetros que transcorren por pista forestal en continuo ascenso, con tramos costos, ata chegar á Collada de Valdenocillo (1.396 m).

            Dende a subida podemos ver o Cueto Ancino, montaña de grande fermosura e unha caseta instalada nunha árbore. Proseguimos a marcha é, segundo avanzamos achegándonos ao outeiro temos que cruzar dúas veces o Arroyo de  las Regueras.

            Sen perda e sen deixar de subir, acadamos a Collada de Valdenocillo, lugar desde o que vemos os dous vales e as montañas que nos rodean.

            A baixada agora é rápida é, preto de Valdeteja temos que cruzar o rego xunto a unha cadra onde atopamos a pista que nos levará ó centro do lugar. Pasamos xunto ao cemiterio e logo dunha visita a este lugar aproveitamos para coller auga na fonte situada no centro da poboación (1.220 m).

            Desde a fonte, seguimos en dirección norte ata acadar a estrada LE - 313 que seguimos en dirección noroeste uns trescentos metros. Aparece unha pista pola dereita pola que imos polo fondo do val que vai paralela á estrada e ao regato Valdeteja, ata Valverde de Curueño, onde remata esta travesía.

            Si temos tempo e folgos, podemos seguir pola estrada ata a Collada de Valdeteja situada a dous quilómetros en dirección a Genícera.